Braaibroodjie Indeks (Maart 2025)
Jou maandelikse Braaibroodjie Indeks deur Johann Biermann.
Wat is die Braaibroodjie Indeks?
Die Braaibroodjie Indeks is ’n alternatiewe blik op voedselinflasie, gebaseer op die koste van ’n baie spesifieke “mandjie”: die bestanddele van ’n klassieke Suid-Afrikaanse braaibroodjie.
In plaas van breë verbruikersmandjies en ingewikkelde ekonomiese formules, fokus dié indeks op iets herkenbaar en alledaags — witbrood, tamaties, uie, Cheddar-kaas, blatjang, sout en peper. Deur die prysveranderinge van hierdie eenvoudige bestanddele dop te hou, bied die indeks ’n alternatief om te sien hoe voedselkostes verander. Dis voedselinflasie oor die kole, eerder as ekonomie in Excel.
Braaibroodjie Indeks (Maart 2025)
Teen einde Maart 2025 kos ’n standaard braaibroodjie nou R21.31 - ’n styging van 5.2% in net een maand, en 4.5% vir die jaar tot dusver.
Die Braaibroodjie Indeks is nie ’n formele maatstaf van inflasie nie, maar dit sê tog iets: wanneer kaas met 6.6% duurder word en tamaties met 11.1%, voel jy dit eerste op die braairooster — en later op die begroting. Hierdie was die grootste maandelikse sprong sedert die Covid-19 chaos van Mei 2020.
Met dank aan Johann Biermann wat die data met deeglike sorg en ’n skerp oog vir detail saamstel — een sny ekonomiese insig op ’n slag.
Die Braaibroodjie Indeks sal voortaan elke maand op OntLaer beskikbaar wees — ’n klein, maar smaakvolle manier om die groter prentjie van voedselpryse dop te hou.
 | A guest post by |
Ek mis botter in die indeks. Botter (nie margarien of enige ander giftige plaasvervanger nie), aan die buitekante gesmeer, is 'n noodsaaklike (en duur) bestanddeel van 'n ware braaibroodjie. Daarsonder is 'n braaibroodjie 'n roosterbroodjie.