Filmresensie: My F*k Marelize, wat 'n fliek!
Vat jou familie en lag en huil saam.
Opsomming:
Resensent: Albert Nieman
Film: My F*k Marelize
Punt: 8/10
Rolverdeling: Met Je-ani Swiegelaar, Neels Clasen, Zandélle Meyer en Nichola Viviers
Regisseur: Zandré Coetzer
Draaiboekskrywer: Brett Innes
Lokprent:
Resensie:
Heidi Horn is 'n ma met 'n ysterwil wat haar kanker wegsteek vir haar familie.
Marelize is haar ongeluksvoëldogter in matriek. Marelize moet leer hoe om 'n fiets te ry sodat sy au pair werk in Amsterdam kan gaan doen. Wat kan tog verkeerd gaan?
Hierdie ware verhaal se agtergrond lê in die storie van die Namibiër Marelize, wie tydens Covid, internasionale roem bereik het danksy 'n video wat haar ma, Heidi, geneem het.
In die kort video het Marelize met 'n fiets rondgery op 'n rugbyveld in Windhoek en tromp-op in 'n rugbypaal vasgery. Dis toe dat haar ma se gevleulde woorde in die volksmond verewig is. “My f*k Marelize”.
Die oorspronlike video van 17 sekondes was skreeusnaaks. Die fliek is ook.
Draaiboekskrywer Brett Innes het die familie gekontak en uitgevind daar is meer tot die verhaal. Dis waar Heidi se geheime stryd met kanker uitgekom het. Innes het die drade meesterlik bymekaargebring en 'n eg Afrikaanse moewie geskryf wat wyd sal aanklank vind.
My F*k Marelize het by die onlangse KYKNET Silwerskermfees in Kaapstad premiere. Die stortreën en duur drankies (R90 vir 'n glasie vonkelwyn) kon nie die gemoedere demp nie en die enorme gehoor was een van die grootste nog vir 'n openingsaand premiere by die fees, wat vanjaar dertien jaar oud is. Die Horn-gesin was self in die gehoor vir die vertoning en is staande toegejuig deur die who’s who van die Suid-Afrikaanse filmbedryf.
Dis 'n drama, so moenie Vuil Wasgoed verwag nie. Dis egter ook nie 'n donker – ek sluk eerder 'n handvol glasskerwe as om dit weer te moet kyk - drama nie. My F*k Marelize is 'n heerlike familiefliek wat gaan maak dat jy jou geliefdes wil bel en lank gesels.
As regisseur, het die dinamiese Kaapse filmguru Zandré Coetzer, die Namibiëse familieverhaal met die regte hoeveelheid deernis en komedie na die grootskerm gebring. Terloops, Coetzer is ook die dirigent agter die uitstekende produksiemaatskappy Nagvlug Films. Die hemel weet waar kry sy al haar energie. Al wat 'n mens kan vra is: Nog asseblief, Zandré!
Die rolverdeling is meesterlik, met Zandélle Meyer wat skitter as Marelize. Neels Clasen en Je-ani Swiegelaar is uitstekend as haar ouers, Tiaan en Heidi. Nichola Viviers, as die ouer suster Wilmari, voeg 'n heerlike ondeundheid by, wat die gesinsdinamiek perfek afrond. Dis egter veral Swiegelaar, self 'n Namibiese boorling, wat 'n besonders kragtige en emosionele vertolking lewer.
Swiegelaar en Meyer het welverdiend elkeen met 'n Kyknet Silwerskermfeestoekenning weggeloop, onderskeidelik vir beste aktrise en beste vroulike byspeler in 'n speelfilm. Die fliek het ook die toekenning ontvang vir feesgunsteling.
My F*k Marelize is 'n fliek wat groot ondersteuning verdien. Vat jou familie. Lag en huil saam.
En spoiler alert, Marelize kan deesdae wel fietsry.
(My F*k Marelize sal op 29 Augustus 2025 in Suid-Afrikaanse filmteaters open - red.)
Albert Nieman skryf onder 'n skuilnaam.
Nog artikels op OntLaer:
Volg OntLaer Facebook en LinkedIn vir ons jongste artikels, potgooi-gesprekke en redaksiebriewe asook bydraes en insigte van skrywers regoor ons netwerk.
INTEKEN OPSIES:
Wil jy stukke soos die direk in jou inboks ontvang – weekliks of daagliks – en terselfdertyd ons werk ondersteun? Kies hieronder jou voorkeur.